Fermandara YPJ’ê Jînda Botan li Kobanê bi merasimekê hat oxir kirin her wiha cangoriyê azadiye Qehreman Kobanê jî hat bibîranîn.
Şêniyên Kantona Firatê bi merasîmekê fermandara YPJ’ê Sîham Îbrahîm bi nasnav Jînda Botan û Qehreman Kobanê (Mistefa Henêfî) bibîr anî. Fermandara YPJ’ê Jînda Botan di 25’ê Kanûna 2024’an li Qereqozaq şehîd bûbû. Îro li Kobanê Pakrewangeha Şehîd Dîcle berbi rêwîtiya xwe ya dawî ve hat oxir kirin. Merasîm bi deqeyeke rêzgirtina ji ser rihê şehîdan merasim hate destpêkirin.
Fermandar Demê Jîndar Botan
Li eniyên Tişrîn û Qereqozaqê fermandar Jînda Botan bi îdia û biryardariyeke mezin li hemberî êrişên dagirkeriya Tirk çeper digre û derbeyên giran li dagirkeran dide. Fermandara Jînda Botan di temenekî ciwan de piştî ku Kobanê ji DAIŞ’ê hate rizgar kirin, di sala 2015’an de bi biryardariyeke bilind ji bo destkeftiyên şoreşê biparezê berê xwe de nava refên YPJ’ê. Fermandar Jînda di nava 10 salên xwe yên şoreşê de bi sekna xwe ye dilnizm, fedakar û jixwe bawer bi kelecaneke mezin jiya. Fermandar Jînda kesayetê xwe bi şoreşê re kire yek û wek jineke şoreşger di warê bîrdozî û leşkerî de gihîşt asteke diyarker ku karibû ji hemû erk û berpirsyariyên demê re bibe bersiv. Jînda Botan bi kesayeta xwe ya çalak, di eniyên şer de jî herdem li pêş bû. Di sala 2019’an de li hemberî êrişên dagirkeriya dewleta Tirk parastina deskeftiyên şoreşa jin kir û di şerê Berxwedana Rûmetê de birîndar bû. Fermandar Jînda rûxmî birîndariyê jî, di perwerdeyên branşan de di warê taktîk û stratêjiya şerê demê de bû fermandareke jin ya pêşeng. Di berxwedana eniya Qereqozaqê de Jînda Botan bi sekna xwe ye wêrek û şerker, bû sembola tarzê fermandariya demê.
Merasîma Şehîd Jînda Botan bi sloganên xwedî derketina mîreteya şehîdan û bi tililiyên dayikan bi dawî bû.
Navenda Ragihandina YPJ
14.07.2025
