Emê bi Rihê Arînan ji Pêngava Azadiyê re Bibin Bersiv

90

Di salvegera 6. A çalakiya canbexşane ya ku rêheval Arîn Mîrkan li Kobanêya berxwedêr pêk aniye, em Şehîd Arîn Mîrkan bi jiyana wê ya şoreşgerî û çalakiya wê ya ku li cîhanê deng veda bi rêzdarî bibîrtînin. Rêheval Arîn bi rêgeza welatparêziyê ya Bîrdoziya Rizgariya Jinê dil û mêjiyê xwe ava kiribû û bi vî awayî karibû di serdema herî giran a şerê Kobanê de bi çalakiya xwe li tevahî cîhanê deng vede. Arîn bû remza jinên Kurd yên leheng û hêza rêxistinkirî ya jinên Rojhilata Navîn. Rêheval Arîn ji bo jinan û tevahî gelan bû nexşerêya parastina ax û welat. Ji bo gelê Kurd ku bi salan bû di bin siya dagirkeriyê de jiyan dikir, bû hilmek ji azadiyê û ji bo neyarên gelê Kurd ku li benda mizgîniya ketina Kobanê bûn, bû bersiveke mezin. Bi vî rengî Rêhevala me Arîn Mîrkan tola herî mezin ji dijminê Kurda yê ku bi salane her cûre êrîş, komkujî, îmha û înkarkirinê dimeşîne ji Erdogan û çeteyên DAİŞ’ê girt.
Kesayeta heval Arîn, tarzê jiyana wê û çalakiya ku wisa li darxist ji bo artêşa me her dem dibe baweriya hêz û moraleke mezin ku em jî weke şopdarên hevala xwe Arîn bi biryar têkoşîna xwe didomînin û mezin dikin. Avakirin û mezinbûna YPJ’ê îlhama xwe ya herî mezin ji pêşengên weke Rêvan Kobanê, Zehra Penaber, Destîna Qendîl, Jiyan Rojhilat, Gulan Batman û Arîn Mîrkan’an, girt. Çalakiya Rêheval Arîn di gelên ku bi hêviya azadiyê dijîn de hesta welatparêziyê xurtir kir û Kurdên ji her çar parçeyên Kurdistanê ji bo ku xwe bighînin wê cenga berxwedanê berbi Kobanê ve ketin rê. Heval Arîn bi çalakiya xwe wîjdanê mirovahiyê şiyar kir û ji her deverên cîhanê bi sedan kesên azadîxwaz cihê xwe di refên YPJ û YPG’ê de girtin.
Ser faşîstê mezin Erdogan û çeteyên xwe jî ger roja îro ji bo serhildanên 6-8 Cotmehê êrîşê HDP’ê dike, girtina, êşkenceyan dike, ger Kurdistaniyên Bakûrî ji helîkopteran davêje, tecawiz û tacîzan li ser jinê rewa dike sedem, ne qebûlkirina binkeftina xwe ya ku di Kobanê de jiyan kiriye. Erdogan baş dizane ku jinên Kurd bi her awayî xwe bi rêxistin kirine, bûne xwedî hêz û ji dagirkeran re meydan dixwînin. Her wiha baş dizane wê roj were ku têkoşîna Arînan Kurdistanê azad bike. Ji ber vê jî bi rengek hovane, her cure êrîşê li ser gelê me dimeşîne. Vaye îro jî hewldanên dagirkeriyê bê navber didomin. Îro di bin navê ewlekariya sînoran de xendek, çeper û baregehên nû tên çêkirin. Ev jî di bin serweriya PDK’ê de tê kirin û ev nîşaneya hevkariya wê ya bi dewleta Tirk a dagirker re ye. Ji ber wê em bang li tevahî jinan û gelê xwe dikin ku bi tundî li dijî van hewldanên dagirkeriyê derkevin.
Em weke Fermandariya Giştî ya YPJ’ê pêngava ‘Dem Dema Azadiyê Ye’ silav dikin. Em wek şopdarên Arîn Mîrkan’an dibêjin ku; em tecrîdê, faşîzmê û dagirkeriyê napejrînin û ji bo azadiya Rêber Ocalan û welatê xwe li gor soza ku me daye Arînan emê heya dawî têkoşîn bikin û xwedî li vê pêngavê derkevin. Ji ber dilsoziya Arînan têkoşîneke bi vî awayî bilind ji me emir dike.

Fermandariya Giştî ya YPJ
5 Cotmeh 2020