Şervana YPJ Nucan Serdar Amed bi peyamekê Cejna Newroza Gelan pîroz kir. Di peyama xwe de wê diyar kir ku ruhê Newrozê nîşana nûbûnê û tekoşîneke bêhempa ye. Û wiha peyama xwe domand: “Di serî de, em 21ê Adarê, roja Cejna Newrozê, li Rêber Apo û hemû rêhevalên me yên ku di çeperan de berxwedanê didin, tekoşin dikin û di dîlgirtiyê de ne, pîroz dikin. Her wiha, bi ruhê Kawayê Hesinkar, em vê cejnê li malbatên şehîdan û malbatên dîlgirtiyan jî pîroz dikin.
Cejna Newrozê ku em her sal pîroz dikin, ji bo me û gelan gelek bi wate û pîroz e. Di roja Newrozê de di dîrokê de tekoşîneke mezin hatiye meşandin û serhildaneke girîng derketiye holê. Bi ruhê Kawayan, bi ramanên Rêber Apo û bi ruhê şehîdan, em tekoşina xwe bilind dikin.
Bila dijminên qirker û dagirker baş bizanin ku em tu caran li hember kiryarên wan bêdeng namînin û serî natêwînin. Em niha li çeperên Kobanê ne û axa xwe diparêzin. Bi ruhê Newrozê em ê tekoşina xwe zêde bikin û di nava şoreşa jinan de bi taybetî gavên xurttir bavêjin.”
Di dawiyê de, wê Cejna Newrozê li hemû gelan û cîhanê pîroz kir.
